Day 47: Chaitra Navratri Day 1 – Maa Shailputri Puja aur Kalash Sthapna ki Saral Vidhi

 

🙏🙏 Jai shree shyam 🙏 🙏 

Maa Shail putri: Shakti aur Dridh ta ka Roop

Doston, kal bahut thakan ki wajah se post nahi kar payi, isliye aaj Maa ki sundar pooja ke saath Day 47 shuru kar rahi hoon. Sorry deri ke liye!"

Namaste doston! Aaj mera Day 47 hai aur aaj ki raat mere liye bahut khaas hai. Aaj se Navratri ka pavan tyohar shuru ho raha hai. Navratri ke pehle din hum Maa Shailputri ki puja karte hain. 'Shail' ka matlab parvat hota hai. Jaise parvat apni jagah par mazbooti se khada rehta hai, Maa humein bhi waisi hi shakti deti hain ki hum apne sapno aur lakshya (goal) par tike rahein.

Mera Pichla Anubhav aur 'Jitni Shakti Itni Bhakti'

Doston, pichle saal maine bahut kathin vrat rakha tha. Maine fal, meetha aur do din nirjala (bina paani) rehne ki koshish ki thi. Meri halat itni kharab ho gayi thi ki mujhe chakar aane lage aur raat ko 12 baje pani peena pada. Us waqt mujhe samajh aaya ki Mata Rani ya Baba Shyam kabhi ye nahi kehte ki tum apne sharir ko kasht dekar meri puja karo. Bhakti dikhawe mein nahi, mann ki sachayi mein hoti hai.

Is baar maine tay kiya hai ki main sirf Pehla aur Aakhri (Ashtami/Navami) vrat rakhungi. Maa toh 'Maa' hain, wo meri majboori aur meri mehnat dono samajhti hain.

Kalash Sthapna ki Shuddh aur Saral Vidhi

Bahut se log confused rehte hain ki Kalash kaise sthapit karein. Ise bahut hi pavitra mann se kijiye:

1:- Bartan ka Chunav: Kalash ke liye Tambe (Copper) ya Kase (Bronze) ka lota sabse shuddh hota hai. Agar ye na ho, toh mitti ka kalash bhi shubh hai.

2:-Pavitra Jal: Kalash mein shuddh jal bhare in aur thoda Gangajal milayein.

3:-Samagri: Kalash ke andar ek sikka (Rs 1 ya 5 ka),  agar silver ho to aur jyada achcha ek supari, thode se akshat (chawal), durva ghaas aur ek haldi ki gaanth zaroor dalein.

4:- Sajawat: Kalash ke mukh par 5 ya 7 aam ke patte lagayein aur uske upar laal kapde mein lapeta hua nariyal rakhein. Nariyal ka mukh hamesha apni taraf hona chahiye.

Vrat ke Niyam: Sui aur Kainchi Kyun Mana Hai?

Ek zaroori baat jo hamare bade- buraag kehte hain—jo log vrat rakhte hain, unhe sui aur kainchi ka istemal nahi karna chahiye. Maana jata hai ki sui-kainchi chalane se vrat 'kat' jata hai. Iska gehra matlab ye hai ki ye din kuch 'kaatne' ya 'alag karne' ka nahi, balki 'jodne' aur 'srijan' ka hai. Hum stitching karte hain, par vrat ke din in cheezon se door rehkar sirf Maa ka dhyan dharna chahiye.

Kaise Karein Puja aur Path?

Agar aap Durga Saptashati nahi padh sakte, toh pareshan na hon. Aap mobile par uska path sun sakte hain ya sirf Durga Chalisa padh sakte hain. Maa ke samne shuddh ghee ka diya jalayein aur unhe safed rang ka bhog (Ghee, Makhan ya Misri) lagayein.

Mera Sapna aur Baba Shyam ka Ashirwad

Main shop par Laddu Gopal  aur Baba Shyam ki seva karti hoon, par mera mann kehta hai ki 2027 tak mera apna khud ka ghar hoga. Ek aisa ghar jahan main dhoom-dhaam se Maa ki chauki lagaungi aur Kan jak bithra ungi. Baba Shyam aur Mata Rani meri ye fariyad zarur sunenge. Meri ye blogging ki mehnat usi ghar ki pehli eent (brick) hai.

A Message for the World

To my global readers, Navratri is about the power within every soul. Even if you don't follow the full ritual, just light a candle and pray for your dreams today. Our culture is all about faith, love, and ngth.

Navratri Special Shayari

"Hauslo ki udaan abhi baaki hai,

Mera imtihan abhi baaki hai...

Maa ne thama hai haath, toh darr kaisa?

Abhi toh mera poora aashiyana baaki hai!

Jitni Shakti, Utni Bhakti ka sankalp liya hai,

Mera ghar, meri pehchan banna abhi baaki

 hai. 

Hashtags (#) 

#Navratri2026 #Shakti #IndianCulture #DivineFeminine #GlobalBlogger #Spirituality

🙏🙏Jai Shree Shyam 🙏 🙏 

Doston, agar aapko meri ye Day 47 ki koshish aur Navratri ki ye saral vidhi pasand aayi ho, toh please mujhe support zaroor karein:

Like & Comment: Comment mein "Jai Mata Di" ya "Jai Shri Shyam" zaroor likhein. Aapka ek comment mujhe dheron himmat deta hai.

Share: Is post ko apne doston aur family ke saath share karein taaki wo bhi is saral vidhi ka laabh utha sakein.

Subscribe: Mere blog ko follow karein taaki meri 'Khwab Udaan Ki' journey mein aap hamesha mere saath rahein.

Mera Pichla Safar (Previous Blog Link)

Agar aapne mera kal ka blog miss kar diya hai, jahan maine apni thakan aur blogging ke sangharsh ke bare mein bataya tha, toh aap niche diye gaye link par click karke use padh sakte hain:👉[https://khwabudanoki.blogspot.com/2026/03/day-46-thakan-se-manzil-tak-ka-safar.html in] 

Aaj main  kisi aur ki shop par  kaam karti hu par    baba shyam aur laddu Gopal .  Aur Maa se bas yahi prarthna hai ki agle saal tak wo mujhe mera aashiyana de dein. Aap sab bhi mere liye dua zaroor karna!