July 2020: Meri Nanhi Beti aur Ye Chip-chipi Garmi

 Date:-20/2020

Time:- 1:30 PM

"July ka ye hafta bahut bhari hai. Baarish ho nahi rahi aur garmi itni hai ki sharir bilkul saath nahi de raha. Pregnancy ka ye 6th mahina aur Thyroid ki thakan... kabhi-kabhi toh uthna bhi mushkil lagta hai.

Meri beti, jo abhi mushkil se dhai saal ki hone ko hai, wo poore din mere aas-paas ghoomti rehti hai. Wo itni nanhi hai ki use kya pata ki uski maa ki tabiyat kaisi hai. Wo kabhi khelne ke liye zid karti hai, toh kabhi kuch poochti hai. Mera mann hota hai ki main use acche se baith kar kuch naya sikhau, uske saath khelun, par ye garmi aur sir ka dard... mujhse kuch nahi ho pata.

Jab main thakan ki wajah se use thik se sambhal nahi pati ya thodi der ke liye let jati hoon, toh ghar mein sabke tevar badal jate hain. Sabko lagta hai main susti kar rahi hoon, par unhe kya pata ki is garmi mein kitchen ka kaam aur upar se ye bhari sharir... main kaise sambhal rahi hoon. Kisi ko meri takleef dikhayi nahi deti, bas meri galtiyan ginte rehte hain.

Ye baatein main kisi se keh nahi sakti, isliye jab pati ghar par nahi hote, tab chori-chupe apni is diary mein likhti hoon. Jaise hi wo darwaze par aate hain, main turant mobile mein kuch aur dekhne lagti hoon ya mobile side rakh deti hoon. Unhe lagta hai main mobile mein waqt barbad kar rahi hoon, par unhe kya pata ki ye diary hi mera wo sukoon hai jahan main apne aansu chhupa leti hoon. Agar unhe pata chala ki main ye sab likhti hoon, toh phir wahi tana milega ki 'tum chugali karti ho'. Par main kya karun? Kahin toh dil halka karna hi padega n

a."